追憶陳載澧博士

追思我哋大學時期影響最大嘅老師、舍監Dr Chan陳載澧博士

送完Dr Chan最後一程，坐下來靜思，沉澱內心的感受與回憶片段百味紛陳。

隨手翻開場刋，見到「……驀然回首，那人卻在，燈火闌珊處」，彷彿Dr Chan在遠處……就在他用手機拍下「GIVE WAY 讓」的路牌旁，面帶微笑站在那片樹根縱橫茂密生長的磚路上揮手道別。

Dr Chan一路走好！

【附上追思Dr Chan的悼词講稿】

Josephine、Professor Ng、吳太、各位來賓，大家好。我係Dr Chan 任康寧堂舍監時期嘅學生馮韌。用Dr Chan嘅說話講，我係果批八十年代末至九十年代中「不老不嫰的一大群」舍堂活躍分子其中一個。

作為Dr Chan嘅學生，我同好多堂友一樣，雖然未有喺正式課堂上受教於Dr Chan，但佢卻係我哋大學時期影響最大嘅老師。

最初認識Dr Chan係因為當舍堂學生會exco 嘅關係 ，對Dr Chan嘅學養才藝並唔了解，依然記得當時只係戰戰兢兢、硬住頭皮去「招呼」舍監 ，一心諗住只係想去爭取佢幫我哋攞暑假前夕同聖誕節兩個陸佑堂嘅黃金檔期去搞舞會活動，結果卻係喺佢引領、指導下，果年我哋一班堂友除咗喺陸佑堂嘅黃金檔期活動取得空前成功之外，就連戲劇文化為主嘅康寧之夜都搞得有聲有色，就咁樣同Dr Chan日漸熟稔，匆匆三年大學眨眼就過。而最意外嘅係Dr Chan竟然令我喺畢業後一年仍繼續踏足陸佑堂….不過係参加演出佢創作嘅神劇「從前有座山」飾演群眾甲角色，從而叫我喺陸佑堂親身參與去見識不一樣戲劇世界。

相信我哋唔同時期學生同Dr Chan嘅交往、學習經歷必然各式各樣、大不相同，但大家睇返轉頭，佢為我哋上嘅果一科卻無因為有冇考試及學分而止於成績單或學位上，而係伴隨我哋喺人生不同階段中成長，歷久常新。對於我哋嚟講，無論呢個科目係叫「舍堂教育」、「通識教育」又或者「全人教育」都好，都必定有住Dr Chan嘅影子。

畢業後因工作東奔西跑，雖然好少同Dr Chan再有見面聯絡，但每當商旅途中報紙上見到佢喺繁星哲語嘅文章，必定細心閱讀，開啟思考視野之餘總有一份好似同佢傾計交流嘅感覺。直至九年多前，Dr Chan雖然巳經退休，但佢仍積極聯絡我哋呢批「不老不嫩」嘅一群去戮力推動、指導並不斷鼓勵我哋去策劃、串連不同年代堂友去籌辦六十周年堂慶、籌組舍堂舊生會、從而去支援學生、希望以舊帶新延續舍堂教育精神。佢果份對學生福祉嘅關懷同熱誠，不止於言談，而係身體力行、出錢岀力令人敬佩！

最後，感覺這刻好似陪同Dr Chan一起企喺陸佑堂台上謝幕一樣，藉此同Dr Chan講：「有賴你的創意破格思維一直啟迪引領我哋成長前進，有你呢一位老師、舍監令我哋感到驕傲、感謝你之餘亦要為你精彩人生和成就鼓掌致敬！」。